सहिद परिवारका नाममा आएको भैंसी पूर्वमन्त्रीको गोठमा

काठमाडौं । प्रदेश २ सरकारले मधेस आन्दोलनका सहिद परिवारका लागि भन्दै भैंसी किनेर पार्टीका नेता तथा पूर्वमन्त्रीलाई वितरण गरेको छ । सिरहामा सरकारले बाँडेको भैंसी पूर्वमन्त्री र पार्टीका नेतादेखि नेताका आफन्तसम्मको गोठमा पुगेका छन् ।

पूर्वकेन्द्रीय मन्त्रीसमेत रहेका समाजवादी पार्टीका नेता राजलाल यादव र उनका छोरीज्वाइँ रमेशकुमार यादवले सहिद परिवारका नाममा आएको भैंसी पाएका छन् । उनीहरुलाई भूमि व्यवस्था तथा कृषि एवं सहकारीमन्त्री शैलेन्द्रप्रसाद साहले बिहीबार लहानस्थित पशुपति आदर्श माविको प्रांगणमा भैंसी हस्तान्तरण गरेका थिए ।

मधेस आन्दोलनमा सिरहाबाट ६ जना सहिद भएका थिए । यो जिल्लामा सरकारले १८ परिवारलाई भैंसी बाँडेको छ । तर, तीन सहिद परिवारले भैंसी पाएका छैनन् । यो समाचार आजको नयाँ पत्रिका दैनिकले छापेको छ ।