सिरहामा प्रहरीको गोली लागेर भारतीय लागुऔषध कारोबारी पक्राउ

 सिरहा, १९ असार – सिरहाको नवराजपुर गाउँपालिका–५ मा शुक्रबार प्रहरी र लागुऔषध कारोबारी समूहबीच गोली हानाहान भएको छ। प्रहरीका अनुसार लागुऔषध कारोबारी समूहले प्रहरीमाथि एक राउन्ड गोली प्रहार गरेपछि प्रहरीले जवाफी फायर गरेको थियो। उक्त क्रममा भारतको मधुवनी निवासी अब्दुल कलामको खुट्टामा गोली लागेको प्रहरीले जनाएको छ। सिरहा प्रहरीका प्रवक्ता डीएसपी रमेशबहादुर पालका अनुसार घाइते अब्दुलको साथबाट १२२ ग्राम ब्राउन सुगर र एक थान कटुवा पेस्तोल बरामद गरिएको छ। घटनामा संलग्न अन्य २–३ जना फरार रहेकाले उनीहरूको खोजी तीव्र पारिएको प्रहरीले जनाएको छ। घटनाबारे थप अनुसन्धान भइरहेको छ।