जन्ताको चाहाना अनुसार राजनीति भएको हो: निकेश त्रिपाठी

सर्लाही २६ गते  सर्लाही । सर्लाही निर्वाचन क्षेत्र नं. ४ को राजनीतिक वातावरण पछिल्ला महिनाहरूमा उल्लेखनीय रूपले परिवर्तन हुँदै आएको छ। स्थानीय तहदेखि जनसमुदायबीचका छलफलसम्म, नेपाली कांग्रेस मधेश प्रदेशका उप–सभापति, पूर्व स्वास्थ्य मन्त्री तथा प्रदेश सांसद बिरेन्द्र प्रसाद सिंहको नाम फाल्गुनमा हुने प्रतिनिधि सभाको उमेदवारमा जनचाहनाको केन्द्र बन्दै गएको देखिएको छ। नेपाली कांग्रेस मधेश प्रदेशका सूचना तथा सञ्चार विभागका सचिव निकेश त्रिपाठीले आज सञ्चारकर्मीहरूसँग कुरा गर्दै जनमत स्पष्ट रूपमा सिंहतर्फ मोडिएको दाबी गरेका छन्। उनका अनुसार, “बिरेन्द्र प्रसाद सिंहको नाम बनावटी रूपमा होइन, जनताकै आग्रह र आशाबाट बलियो रूपमा अघि आएको हो। सर्लाही–४ का नागरिकहरूले विकास, सुशासन र जवाफदेही नेतृत्वका लागि सिंहलाई सबैभन्दा उपयुक्त व्यक्तित्वका रूपमा पहिचान गरेका छन्,” त्रिपाठीले बताए। सर्लाही–४ भित्रको राजनीतिक बहस र जनस्तरको प्रतिक्रिया हेर्दा सिंहप्रतिको समर्थन दिनानुदिन बढिरहेको जनाइएको छ। स्थानीय समस्यामा प्रत्यक्ष सहभागिता, जनतासँगको निरन्तर सम्बन्ध, र स्पष्ट रूपमा उठाइने स्थानीय मुद्दाहरूले सिंहलाई जनताको पहिलो विकल्पका रूपमा अघि सारेको बुझिएको छ। स्थानीय बासिन्दाहरूले क्षेत्रका प्रमुख प्राथमिकता—सडक तथा पूर्वाधार, शिक्षा सुधार, स्वास्थ्य सेवा विस्तार, कृषि प्रवर्द्धन तथा युवामैत्री योजनाहरू—अगाडि बढाउन सक्ने सम्भावित नेता सिंहलाई ठानिरहेका छन्। गाउँदेखि बस्ती, टोलदेखि बजारसम्म सिंहबारे भइरहेका सकारात्मक चर्चा र समर्थनले आगामी राजनीतिक समीकरणमा उनको प्रभाव झनै बलियो हुँदै गएको देखिन्छ। समग्रमा, सर्लाही क्षेत्र नं. ४ मा बिरेन्द्र प्रसाद सिंहको उभार आकस्मिक होइन; यो जनताले निर्माण गरेको प्राकृतिक नेतृत्वको परिणाम भएको राजनीतिक विश्लेषकहरू बताउँछन्।