बर्दियामा धानखेतमा शिक्षक–विद्यार्थी: बबई शिशु माध्यमिक विद्यालयको ‘पढ्दै कमाउँदै’ कार्यक्रम

 बर्दिया जिल्लाको ठाकुरबाबा नगरपालिकास्थित बबई शिशु माध्यमिक विद्यालयले ‘पढ्दै कमाउँदै’ कार्यक्रमअन्तर्गत विद्यालयमै धान खेती गरी उल्लेखनीय उपलब्धि हासिल गरेको छ । विद्यालयका शिक्षक, विद्यार्थी र विद्यालय व्यवस्थापन समितिका सदस्यहरूको संयुक्त पहलमा गरिएको यो नवप्रर्वतनात्मक कार्यले शिक्षासँगै व्यावहारिक सीप र आत्मनिर्भरता सिक्ने अवसर प्रदान गरेको विद्यालयले जनाएको छ । विद्यालयका अनुसार विद्यार्थीहरूले खेतीको सम्पूर्ण प्रक्रियामा — बिउ छर्ने, रोपाइँ, निराइ–गुड़ाइदेखि काट्ने र झार्ने कार्यसम्म — प्रत्यक्ष सहभागिता जनाएका छन् । यसले विद्यार्थीहरूमा श्रमको सम्मान, कृषि सीप र समूहमा काम गर्ने संस्कार विकासमा मद्दत पुगेको बताइएको छ । यस कार्यक्रमले विद्यार्थीहरूमा जिम्मेवारीबोध र उत्पादनशील सोच जागृत गरेको छ । ‘पढ्दै कमाउँदै’ कार्यक्रम अन्तर्गत उत्पादित धान विद्यालयको मध्याह्न भोजन कार्यक्रम र अन्य शैक्षिक गतिविधिमा उपयोग गरिने बताइएको छ । सामाजिक र शैक्षिक क्षेत्रमा उदाहरणीय मानिएको यो पहलले अन्य विद्यालयहरूका लागि पनि प्रेरणादायी नमूना प्रस्तुत गरेको छ ।