बिष्णुपुरमा चार दर्जनभन्दा बढी स्थलमा लोकआस्थाको पर्व छठ भोलि एकसाथ हुँदै

बिष्णुपुरमा चार दर्जनभन्दा बढी स्थलमा लोकआस्थाको पर्व छठ भोलि एकसाथ हुँदै सिरहा । सिरहा जिल्लाको बिष्णुपुर गाउँपालिकाभर भोलि लोकआस्था, विश्वास र आत्मशुद्धिको प्रतीक पर्व छठ पूजा भव्य रूपमा मनाइने तयारी पूरा भएको छ । गाउँपालिकाभरका चार दर्जनभन्दा बढी पोखरी, कुवा, नदी र नहरहरूमा एकै साथ छठको मुख्य अर्घ्य अर्पण गर्ने तयारी भइरहेको छ । छठ पर्व सूर्यदेवको उपासना, जल र प्रकृतिप्रतिको आस्था तथा मानव र प्रकृतिको सह–अस्तित्वमा आधारित पर्व हो । यो पर्व कार्तिक शुक्ल पक्षको चतुर्थीदेखि सप्तमीसम्म मनाइन्छ । यस वर्ष छठ पर्व कार्तिक ९ गतेदेखि सुरु भई भोलि आइतबार साँझ अस्ताउँदो सूर्यलाई र सोमबार बिहान उदाउँदो सूर्यलाई अर्घ्य अर्पण गर्दै सम्पन्न हुनेछ । बिष्णुपुर गाउँपालिकाका सबै वडामा रहेका पोखरी, कुवा, नहर र शाखानालाहरूमा सरसफाइ तथा सजावट तीव्र गतिमा भइरहेको छ । स्थानीय युवा समूह, छठ समितिहरू र स्वयंसेवकहरूले हरेक स्थलमा सरसफाइ अभियान सञ्चालन गरी भक्तजनका लागि सहज वातावरण तयार पारिरहेका छन् । विशेषगरी वडा नं. १ का मुलनहर, बडकी पोखरी, रामदेव डक्टरबला पोखरी, महाबिर जुगत, श्याम र ओलारबला पोखरी, खोरिया र गौरिपुरका मुलनहर पोखरीहरू; वडा नं. २ का गिदरमारी, सुडिबला, राजपुर पोखरी, सुखठोर शाखा र शाइफल नजिकका नहरहरू; वडा नं. ३ का बडकी पोखरी, प्रधानबला पोखरी, सुखठोर शाखा र कटनिया; वडा नं. ४ का हरि, शिवराजी, पगहिया, बिरजा, राम औतारबला र दुर्गा पोखरी, सुन्दरपुर नदी, करहरबा पोखरी र सुखठोर शाखा; त्यस्तै वडा नं. ५ का लक्ष्मीपुर कुटी नहर, माझी पोखरी, देबनारायण पोखरी, कपिल घर जन्जिकको पोखरी, मनोज, पशुपति, महिन्द्र, इन्स्पेक्टरबला पोखरी र शाखा नहर, कुवा लगायतका करिब चार दर्जनभन्दा बढी स्थलहरूमा छठ पर्व धुमधामका साथ मनाइनेछ । सिरहा र सम्पूर्ण तराई–मधेस क्षेत्रमा लोकआस्थाको यो पर्व धुमधामका साथ मनाइँदै आएको छ । यस क्रममा सुरक्षा व्यवस्थामा पनि कडाइ गरिएको स्थानीय प्रहरी कार्यालयहरूले जनाएका छन् । भक्तजनहरूले आज साँझ “नहाय–खाय” विधिबाट छठ पर्वको सुरुवात गरेका छन् । भोलि साँझ अस्ताउँदो सूर्यलाई र पर्सि बिहान उदाउँदो सूर्यलाई दूध, गंगाजल, फलफूल, ठेकुआ, भुसवा लगायतका प्राकृतिक उपज तथा आरतीका सामग्रीसहित अर्घ्य अर्पण गर्ने परम्परा रहिआएको छ । विशेषगरी महिलाहरूले चार दिनसम्म निर्जल व्रत बसेर सूर्यदेव र छठी मइयाको आराधना गर्ने चलन रहँदै आएको छ । पर्वलाई शान्तिपूर्ण र सुसंस्कृत रूपमा मनाउन सबै वडामा औपचारिक माइकिङ वा सचेतना कार्यक्रम नचलाइए पनि स्थानीय युवा, स्वयंसेवक, बुद्धिजीवी र समाजसेवीहरूले “हामी आफैं सचेत भएर पर्वलाई शान्तिपूर्ण रूपमा मनाऔं” भन्ने सन्देश दिएका छन् । छठ पर्वले सामाजिक समरसता, धार्मिक सहिष्णुता र प्रकृतिप्रतिको सम्मानको सन्देश दिन्छ । सामाजिक एकता, आस्था, अनुष्ठान र पवित्रताको प्रतीक यो पर्व राष्ट्रियदेखि अन्तर्राष्ट्रिय स्तरमा पनि विगत धेरै वर्षदेखि भव्य रूपमा मनाइँदै आएको छ । भोलि साँझ सूर्य अस्ताउँदो बेला बिष्णुपुर गाउँपालिकाभरका चार दर्जनभन्दा बढी घाटहरूमा हजारौँ व्रतालुहरू एकै साथ सूर्यदेवलाई अर्घ्य अर्पण गर्नेछन्, जसले सम्पूर्ण गाउँपालिका उज्यालो, दीप र श्रद्धामय वातावरणले झलमलाउनेछ ।