सिरहा प्रादेशिक अस्पतालमा बालकको मृत्यु, आफन्त र गाउँलेको आन्दोलन

 सिरहा — सिरहा सदरमुकामस्थित प्रादेशिक अस्पतालमा उपचारका क्रममा एक १२ वर्षीय बालकको मृत्यु भएपछि उनको परिवार र स्थानीयवासी आन्दोलित भएका छन्। सिरहा नगरपालिका–६ का झबुलाल महराका छोरा राजन रामलाई आज बिहान करीब साढे १० बजे अचानक बेहोस भएपछि अस्पतालमा भर्ना गरिएको थियो। डा. सुदेशकुमार यादवले प्रारम्भिक जाँचपछि बालकको शरीरमा अत्यधिक रगतको कमी भएको देखिएपछि तुरुन्तै रगत चढाउन सुझाव दिएका थिए। तर, अस्पतालभित्रै रहेको ब्लड बैंकमा रगत नभएको जानकारी दिइएपछि आवश्यक उपचार नपाई बालकको ज्यान गएको अस्पताल स्रोतले जनाएको छ। बालकको मृत्युपछि आक्रोशित आफन्त र गाउँलेले अस्पताल अगाडि प्रदर्शन गर्दै सडकसमेत अवरुद्ध गरे। डाक्टरको लापरवाहीको आरोप लगाउँदै उनीहरूले तोडफोडको प्रयास गरेपछि ठूलो संख्यामा सुरक्षाकर्मी परिचालन गरिएको छ। छोराको मृत्युको खबर पाएपछि आमा सुनिता महरा अचेत भई अस्पताल परिसरमै मुर्छित भएकी छन्। घटनापछि अस्पतालको अवस्था तनावग्रस्त बनेको छ।