सिरहाको नरहा गाउँपालिकामा लागुऔषध गाँजासहित तीन जना पक्राउ

प्रदेश टाइम्स / सिरहा, जेठ ४ — सिरहाको नरहा गाउँपालिका–१ देविपुरमा रहेको सिद्धिक्षा पशुपालन तथा कृषी फर्मबाट प्रहरीले ठूलो मात्रामा लागुऔषध गाँजा बरामद गर्दै तीन जनालाई पक्राउ गरेको छ। गोप्य सूचनाको आधारमा २०८२ साल जेठ ४ गते राति करिब ११:३० बजे जिल्ला प्रहरी कार्यालय सिरहाबाट प्रहरी निरीक्षक आकाश उप्रेतीको नेतृत्वमा खटिएको टोलीले स्थानिय जनप्रतिनिधिको रोहबरमा सो फर्ममा छापा मारेको थियो। खानतलासीका क्रममा फर्मभित्र दुई वटा प्लास्टिकको बोरा फेला पारिएको प्रहरी स्रोतले जनाएको छ। ती बोरामा क्रमशः १७.१५७ किलोग्राम र १४.६६३ किलोग्राम गरी जम्मा ३१ किलो ८२० ग्राम गाँजा लुकाइ छिपाई राखिएको अवस्थामा फेला परेको हो। सो कारोबारमा संलग्न रहेको आरोपमा फर्म सञ्चालक संजय दास (३५), रामशरण दास (३१) — दुवै नरहा गाउँपालिका–१ का बासिन्दा — र हाल सोही ठाँउमा गाडी चालकको रूपमा कार्यरत बारा कलैया उपमहानगरपालिका–४ घर भएका धिरज महतो (२०) लाई प्रहरीले पक्राउ गरेको छ। प्रहरीले घटनास्थलबाट लागुऔषध गाँजाका बोरासँगै चार थान मोबाइल र गाँजा सिलाउने मेसिन पनि बरामद गरेको छ। पक्राउ परेकाहरूलाई लागुऔषध मुद्दामा आवश्यक अनुसन्धानका लागि सिरहा जिल्ला अदालतबाट पाँच दिनको म्याद लिई हिरासतमा राखिएको र थप अनुसन्धान भइरहेको जिल्ला प्रहरी कार्यालय सिरहाले जनाएको छ।