सोनमा गाउँपालिकामा दुई मन्दिरको शिलान्यास, पिच सडक निर्माणको घोषणा

प्रदेश टाइम्स सम्बाददाता / धनुषा । सोनमा गाउँपालिकाका मेयर बिशेश्वर यादवले आज दुईवटा विकास निर्माण कार्यको शिलान्यास गर्नुभयो। वडा नं. ४ खेश्राहामा २० लाख रुपैयाँको लागतमा निर्माण हुने महारानी देवी मन्दिरको शिलान्यास उहाँले गाउँका प्रतिष्ठित व्यक्तित्वहरूको उपस्थितिमा गर्नुभयो। त्यसैगरी, वडा नं. २ सोनमामा १५ लाख रुपैयाँको लागतमा निर्माण हुने खाखीबाबा मन्दिरको पनि शिलान्यास गरियो। साथै, मेयर यादवले जनताको विकास आवश्यकता महसुस गर्दै रघुनाथपुर पुलदेखि सोनमा बजारसम्म पिच सडक निर्माण चैत महिनाको पहिलो हप्तादेखि सुरू गरिने घोषणा गर्नुभयो। उक्त योजना विश्व बैंक, ग्लोबल आईएमई बैंक र गाउँपालिकाका पदाधिकारीहरूबीच भएको समझौतापछि अघि बढ्न लागेको हो। यस महत्त्वपूर्ण परियोजनाका लागि गाउँपालिकाका अध्यक्षको पहल सराहनीय मानिएको छ। ,