लहानमा सुनचाँदी पसल लुट्ने योजना बनाउँदै गरेका तीन जना पक्राउ

सिरहा जिल्लाको लहान नगरपालिका-७ स्थित विकास ट्रेडर्स (सुनचाँदी व्यवसायी) मा डाँका गर्ने योजनासहित रहेका तीन जनालाई प्रहरीले पक्राउ गरेको छ। पक्राउ पर्नेहरूमा सिरहा सुखीपुर नगरपालिका-८ का ४५ वर्षीय इन्द्र नारायण चौधरी, लहान नगरपालिका-२२ का ३१ वर्षीय देव कुमार मुखिया, र भारत पश्चिम बंगाल हुगली जिल्ला भगवतीपुर-७ का मेहराज मोन्डल रहेका छन्। गोप्य सूचनाका आधारमा जिल्ला प्रहरी कार्यालय सिरहाका प्रहरी नायब उपरीक्षक (डीएसपी) विरेन्द्र कुमार पासवानको नेतृत्वमा विशेष प्रहरी टोली परिचालित भई माघ २२ गते लहान नगरपालिका-७ बाट उनीहरूलाई नियन्त्रणमा लिएको हो। सोही अभियोगमा लहान नगरपालिका-४ का ४१ वर्षीय दिनेश विश्वकर्मालाई माघ २३ गते पक्राउ गरी थप अनुसन्धान भइरहेको प्रहरीले जनाएको छ। सम्मानित सिरहा जिल्ला अदालतबाट म्याद थप गरी आवश्यक अनुसन्धान अघि बढाइएको छ।