गुनासो पछि तस्करको म्याजिक सहित प्रहरी नियन्त्रणमा

सिरहा, ५बैशाख । तस्करी भइरहेको गुनासो पछि सिरहा प्रहरीले सिरहा नगरपालिका ९ गुलरिया गाउँ नजिकबाट म्याजिक सहित भन्सार छली ल्याएका सरसमान नियन्त्रणमा लिएको छ । सिरहाको माडर खैरटोका भन्सार र विभिन्न प्रहरी इकाई छलेर भित्रिएको ज १ ज ३१५ नम्बरको म्याजिकलाई जनगुनासो पछि सिरहा प्रहरीले गुलरिया गाउँ नजिकमा नियनत्रणमा लिएको प्रत्यक्षदर्शीहरुले बताएका छन् । ‘गुलरिया गाउँ नजिक सेतो कलरको म्याजिकलाई प्रहरीले नियन्त्रण लियो । सो म्याजिकमा चालक सहित दुई जना चढेको थियो । केही बेर प्रहरी केरकार गरेर सिरहा तिर लग्यो,’ प्रत्यक्षदर्शीहरुले भने,‘म्याजिकमा भरिएको बोराहरु राखिएको थियो । प्रहरीले बील माग्दै थिए । बिल देखाउन नसक्दा म्याजिक सहित दुबैजनालाई सिरहा तिर लग्यो ।’ तर, जिल्ला प्रहरी कार्यालय सिरहाका प्रवक्ता रबिन्द्रराज पाण्डेका अनुसार ३० हजार मूल्य बरावरको १५ बोरा मैदा प्रहरीले बरामद गरेको छ । बेवारिसे रहेको अवस्थामा प्रहरीले उक्त मैदा बरामद गरेको उनले थपे । भन्सार, विभिन्न प्रहरी इकाई र जिल्ला प्रहरीलाई समेत तस्कारको म्याजिक भाग्नुले तस्करी नियन्त्रण गर्ने प्रहरीको भुमिकामाथि प्रश्न चिन्ह लाग्न सक्ने धेरै आधारहरु रहेको स्थानीयहरुले बताएका छन् ।